黃澤鋒得女又喜又驚
眞實生活比《白色強人》更戲劇——曾演《飛虎》的藝人黃澤鋒，五十二歲的老婆險死還生，誕下第一胎，母女平安；正要剪臍帶之際，老婆血壓飊升至危急關頭，黃澤鋒被趕出產房，幾乎嚇死。
母女入住ICU，一個星期後，黃澤鋒才公佈喜訊，開頭第一句：幸福不是必然的！
“好驚，好難過。”黃澤鋒報喜也報驚，“唔知點算，我只係希望兩個入去，三個人出返來，平平安安。”
一驚未完又一驚，“醫生對我講，囡囡喊唔出聲，我當時好忟憎，大聲鬧個女：喂！你想點呀？跟住佢就喊啦，一喊出來，咁就冇事了。”生死一瞬，如今母女平安，雖然夫妻都想再生，但澤鋒不想愛妻搵命搏。BB女似爸爸，多頭髪，重六磅，乳名“小黃妃”，英文名為Miracle（奇蹟），十分貼切。
醫生曾向澤鋒解釋，他太太生產時，血壓直線飊升至“妊娠毒血爆發”的臨界點，但只要小朋友生下來，媽咪便安全了。澤鋒說：“囡囡同太太送去ICU瞓咗兩晩，醫生叫我唔使擔心，指太太血壓會慢慢回降，母女平安，於願足矣。”
太太剖腹生女，又住ICU，花了十多萬元。澤鋒坦言負擔不輕，不過，“銀紙使得到先係銀紙，人在天堂，錢在銀行，又有甚麼意思？今次使咗十幾萬，我可以畀得起，今後繼續努力工作囉。一家平平安安，就係幸福生活。”
女兒似父親，又乖，“上天賜我那麼好的禮物，我會好好珍惜。”黃澤鋒對女兒有期望的：“不要求她長大後好叻，只要不危害社會、對社會有貢獻，我已經很開心。”
更開心的是五十二歲媽咪一歲女，長輩多番催促，“黃太”經過十年努力自然受孕，皇天不負有心人。
高 梁