難得的藝訓班眞友情
未入流的小新聞，無線第十三期藝訓班同學聚會，談談笑笑；真正新聞是，林峰發達也識人，每位同學贈送紀念金牌一面。有人稱他金牌藝員——金牌同學是眞。
“第十三期藝員訓練班威水口架，楊怡、林峰、粒粒皆星。”同班書友張美妮爆料：“最難得係，今時今日，同學們電話裡還有‘十三期飯局’群組，吹水食飯永遠齊人。楊怡、林峰一樣極速應機。”事實證明，就算天王、視后，一樣需要朋友，一樣珍惜一班由零開始的戰友。
“旁人眼中，以為天王視后一定高高在上，會與我們這班同學有很大距離。”張美妮強調：“我們識於微時，佢哋態度從未變過，我哋自然可以保持當初的零一樣。”
畢業廿周年聚會，楊怡、徐榮、張美妮、趙永洪、李忠希等出席。林峰特地以去年為楊怡慶祝生日時影的大合照，製成紀念金牌送給每一位同學。網站霎時金光閃閃，大家都將聚會照片上網分享，不忘多謝林峰。
憶昔少年，“我和楊怡，共抗過外敵，共度患難。”張美妮離開無線五年，至今懷孕三月，難忘初識：“有次節目，我哋兩個黐住企，無意中企咗去中間，被主持單打話攝到中間都唔知博乜。我激到哭，阿怡就幫我出頭。”
同期畢業，各有各與命運掙扎：“我兩日冇瞓已叫苦連天。”張美妮講，“阿怡捱到點只兩日冇瞓！我親眼睇住佢，嗰頭喺呢邊嘔完，即行返轉頭繼續拍。十九年，睇到呢啲人，你會明白，人哋成功眞係有原因。”
拍《丫鬟大聯盟》，兩晩冇瞓過覺，等緊下場戲，匿在佈景板後瞌一陣，突然問自己“我喺呢度做乜呢？”張美妮自爆急流勇退的原因：“做咗十幾年，一直做呢啲，想搶啲角色又唔輪到我。如果結婚呢五年，時間心機都擺在屋企……”心態一夜間扭轉，向主祈禱的內容，也從“希望有個好角色”轉為“迎接人生下一章”。如果淨係為興趣，生完仔返轉頭拍戲咪一樣。
高 梁