世盃球迷健康貼士
四年一度的世界盃已“開波”,現正如火如荼。相信有不少球迷晚晚守住電視,觀看兩至三場賽事,成晩冇得瞓。
捱更抵夜一個月睇波,看足六十四場賽事,隨時因長時間睡眠不足,變得“冇記性”兼情緒暴躁,減低腦部運作效率,難以集中精神,影響日間工作表現。同時影響皮膚新陳代謝,承受爆瘡或濕疹之苦。
過度沉迷睇波危害健康,更可能性命不保,刺激的比賽對心臟病患者來講,是最危險及最大的考驗。近日,內地一名廿八歲的球迷因捱夜睇波,加上不健康的生活習慣而猝死。
球迷觀賞賽事時亦要注意身體和飲食健康。應選擇較健康小食,多喝清水或青檸以取代酒精和高糖飲品,遠離煙酒,切勿酒後駕駛;睇波期間保持正確坐姿,以免其後出現肌肉疼痛,抽空適量運動,應在睇波和正常社交保持平衡。睇波最緊要適可而止,唔好搵命搏,要保持足夠睡眠,應付第二日的工作。
健康睇波,除了綜上行為,還應做到“睇波不賭波”,做個精明的球迷。與家人、好友齊觀賞、享受賽事,同樣樂趣多。
蔓 華