姊妹情深互相扶持
肥媽黑妹下月開唱
肥媽(Maria Cordero)與黑妹（李麗霞）將會在十二月十三日至十四日，於伊利沙伯體育館舉行《媽妹笑住唱Part 2》演唱會，“媽妹”近日接受HoyTV主播俞詠文(Angela)訪問，暢談多年姊妹情。
肥媽憶述多年前黑妹打電話給自己邀約合作：“我當時都未識佢，佢打電話嚟話佢有一場騷想我唱，但係畀唔到我嘅價錢。當時我見到佢一個女人帶住個女，咁有膽量，我二話不說就話好，之後就做咗好朋友喇。”
之後因黑妹一句說話愛上打哥爾夫球的肥媽說：“因老公叫我打哥爾夫球，我覺得好悶，死都唔肯打。跟住有一次同黑妹去登台，佢叫我唔使理咁多，攞支棍毆落個波度，真係打到喎，我老公喺現場拍曬手掌。由嗰下開始，我先開始打波，所以我老公錫到佢燶。之後我就經常同老公打波，尤其是係佢離開前嗰三年，所以黑妹係唯一一個叫得到我打波嘅人。”
黑妹稱和肥媽姊妹情深，都是因為一個“義”字，黑妹表示：“喺疫情期間冇嘢做，就返咗去內地，點知唔夠半年，肥媽就不斷call我，叫我返嚟香港。我話落到嚟都冇嘢做，冇工開，佢就話我包你有工開，仲包你紅口添呀。”
肥媽續說時更淚如雨下：“佢一返到落嚟，我就即刻開咗個網上節目一齊做。做節目可以令我平靜，照顧老公嗰幾年，冇壓力就假嘅！佢一離開，我就坐足兩個月輪椅，完全行唔到路，冇咗老公嗰段日子，黑妹就成日陪住我，嗰一關真係好難捱。如果冇黑妹姐陪住我嘅話，我已經癲咗。”
黑妹又稱肥媽老公臨終前，亦有交託她睇住老婆：“當時喺泰國打波，肥媽老公同我講，知道自己時日無多，叫我記得睇住佢，當時我都喊咗出嚟。”