張繼聰開唱鐵鏈鎖嘉賓
由“本地舞台”及“天下一音樂”舉辦的“張繼聰《Welcome to route 37》演唱會”，十二月一日於麥花臣場館舉行。近日阿聰密鑼緊鼓為個唱彩排，他說演唱會雖然押後舉行，反而令他有更多時間準備，笑言希望大家會覺得門票超值。被問有無開始緊張，他說：“唔緊張，因為上次嘅少少意外，反而多咗時間去練歌。聽返之前彩排嘅聲帶，檢討吓點樣可以唱得好啲。加上我呢啲限量型歌手，真係唔知幾時會再搞騷，所以令每張門票更顯珍貴。依家係好享受一啲都唔緊張，臨上台就唔知。”
張繼聰話好多圈中朋友都想嚟支持，搞到自己成身飛債：“圈中朋友都係攞飛比較多，不過都係支持！因為我歌影視都有涉足，太多人要飛，搞到主辦方要用‘五餅二魚’方式搵門票畀我。各式各樣嘅男神、女神都會嚟捧場，因為我想焦點落喺我自己身上唔想同人分享，所以會用鐵鏈鎖住佢哋唔畀佢哋上台。”太太謝安琪與孩子會捧場支持，但阿聰怕囡囡會忍不住眼瞓：“其實囡囡未睇過我做騷，希望佢會享受，因為小朋友鍾唔鍾意好直接，我怕佢扭眼瞓就弊喇。”