同劇藝人開心祝賀
陳展鵬喜為人父
陳展鵬與唐詩詠、伍允龍、姚子羚、陳山聰及劉穎鏇等昨日拍攝新劇《唐人街》一場路祭戲份，期間展鵬突然消失了幾分鐘，原來他在社交平台宣佈已為人父的喜訊。發完喜訊後，他埋位繼續拍攝工作。
陳展鵬與太太單文柔去年十月結婚，兩人的愛情結晶品“小豬比”(Quinta)日前出世。昨日展鵬在社交平台上載全家福照片，宣告女兒“小豬比”已經出世，分享初為人父的喜悅。單文柔透露陳展鵬進產房貼心陪伴，還親自剪臍帶。她說：“看到女兒的笑容，就覺得好幸福、好得意，希望女兒能健康成長。”
雖然昨日天氣悶熱，又要拍攝悲情戲，但喜為人父的陳展鵬在鏡頭外十分風騷，不單與對手有講有笑，與敖嘉年試位拍對打戲時，更擺出跳舞甫士。在休息期間接受訪問時，亦全程笑不攏嘴：“復活節好開心，天氣好，演員又齊人，同埋終於公告囡囡出世。（幾時出世？）大約一星期前，未改中文名，可能讓長輩或太太改。暫時稱呼佢為‘小豬比’，因為囡囡係豬年出世，加上太太叫菲比，結合起來就叫‘小豬比’。其實之前都想同大家分享，但每日都要開工，太太生完又要休息，怕佢應付唔到（傳媒）。太太又要餵人奶，大家要適應吓節奏，為咗個BB改變好多嘢。”
問到可有陪太太入產房及幫BB剪臍帶？展鵬笑說：“全套服務做晒，唔係會畀差人拉。我唔想畀人投訴，男人都要做晒所有事比較好。醫生都好好，由太太打麻醉針開始就畀我一直陪住佢。（見到BB有冇感動到喊？）我一直忙住安撫太太，自己都好緊張好驚，見到太太打針話痛都心痛。當時有一刻諗過，捱得咁辛苦不如唔好生，見佢咁痛又要捱一刀，感覺好難受好心痛，好彩母女平安。”
同劇的伍允龍表示在社交網見到陳展鵬宣佈已為人父，他大讚BB女好得意，也有留言恭喜。他表示事前並不知道展鵬已做爸爸：“因他為人唔高調，見到覺得好窩心。我係第二次同展鵬合作，今次同對方較多對手戲，交流多咗。”他又多謝展鵬及詩詠在演戲上給意見。問到可會送禮物賀展鵬？他笑說：“我要諗諗送乜，我諗好多人會送禮物畀佢，要私下同佢傾，睇佢需要乜。”
姚子羚談及展鵬已為人父時笑說：“佢個衰人，自己發相，生咗都唔同我哋講，一陣會恭喜佢。（送咩禮物？）我怕佢叫我哋折現，我鍾意送金手鐲或者金腳環畀BB，要搵多啲人一齊夾。”她表示近日都很夜收工，打鬥戲更打到雙腿都瘀了，稍後還同山聰拍跳崖戲，又要被對方心外壓。她笑說：“咁益佢嘅戲，我要叫伍允龍做‘替胸’。”
陳山聰透露下星期會與展鵬及伍允龍連續三日拍攝擂台大戰的戲份，到時他要脫去上衣。為了這場戲，山聰操練了幾個月，他說：“呢幾日最後努力，今日我要準備甩水，目標係在兩日內減多五磅，等線條出晒嚟。今日要飲十公升水，要排走身體中的鹽分，之後就脫水，打嗰日又唔可以飲水。”
劉穎鏇笑言很期待這場戲，她當日都有份拍攝，到時會幫他們打氣。談到好姊妹單文柔與展鵬的囡囡出世，她表示很替展鵬高興，並指他最近笑容多咗：“雖然大家拍攝得很疲倦，但他都有跟大家玩。”