受父母婚姻矛盾影響
張敬軒冇癮拍拖結婚
《芷珊約您》前晚一集，播返主持人黎芷珊之前飛到紐約直擊嘉賓張敬軒的美國站巡唱。入行廿年的軒仔，大談由當年隻身赴港發展，到今日成為香港樂壇頂流之一，確實不容易。芷珊還大膽提問大家最想知道的感情事，軒仔坦言開始有想被人照顧的念頭，芷珊問到有否遇過適合的對象，軒仔想了良久才說：“唔係好識到人係真嘅，同埋唔係咁輕易畀人進入到我生命。”他又自認惡頂：“譬如有Potential成為情人嘅人，同一班Friend嚟到我屋企，會喺我屋企攞起啲嘢嚟睇睇，但係佢擺唔返啱個位，咁我就會行埋去擺返啱，咁就完咗喇。”
芷珊向軒仔迫供拍過幾次拖，軒仔說：“拖過一隻、半隻手仔咁啦，我係一個講將來嘅人，但一去到講將來標準就會唔同，我係冇‘不如行吓睇吓點先啦’呢一種，我所有嘢都要Well Planned。”問到有否真正愛過一個，軒仔不諱言：“我覺得我係愛過，其實父母係影響咗我嘅感情觀，佢哋兩個係南轅北轍，佢哋到依家都係唔夾，我見到我媽嘅痛苦，嗰種矛盾到依家四十幾年都係冇解決，佢哋到離開嗰一日都唔會解決得到，我唔可以畀我人生係咁。”軒仔直言如果遇到真愛便會退休：“如果我Commit得佢係我另一半，我會同佢Share人生最後嗰段時間。”