皇馬啃“包”冇黐牙
【本報消息】西甲皇家馬德里為面子而戰,主場出擊撼畢爾包。皇馬人腳實力明顯有優勢,雖然近況一般,但班拿貝主場地利仍有利睇好,有力睇高半線搶勝,全力衝擊次席。
皇馬近況一般,五戰三勝一和一負。皇馬現時帶離第四的西維爾有九分優勢,前三位置基本穩陣。向前望則四分落後次席馬德里體育會,仍有機衝擊次席。皇馬有賓森馬大勇,配合阿辛些奧、伊斯高、巴利等進攻,後防有拿華斯、華拉尼及拉莫斯把關,牌面有明顯優勢。不過畢爾包實力唔差,包括阿度列斯等多名主力復出,連同Ⅰ威廉斯、聖荷西、魯爾加西亞等掛帥,並非無機會。皇馬表現不穩下,要搶三分或需一番苦戰。
畢爾包聖荷西激勵球隊力爭前六:“皇馬今季表現下滑,不過他們仍是贏下不少冠軍的皇馬,仍然擁有很多世界級球員,實力毋庸懷疑。不過力爭前六位置,奪得來季歐霸資格,是球隊目前最大目標,為此必須爭取餘下每一戰勝利。”
西維爾出擊加泰
西維爾作客加泰上演前四爭奪戰。西維爾近況回勇,三連勝後已壓過加泰重奪第四,今戰“六分波”隨時為前四爭奪劃上句號。西維爾人腳牌面有優勢,雖然安祖施華有傷缺陣,但仍有賓耶達、辛拿比亞等領軍。加泰近五戰僅一勝,失去爭四主導權,安祖、J馬達等主力近況回落,今戰雖主場出擊,但要殺退西維爾唔容易。