皇馬一箭傷華奴
【本報消息】西甲皇家馬德里繼續追趕榜首巴塞羅那，班拿貝主場迎戰華歷簡奴，憑賓森馬早段一箭定江山，皇馬小勝一比○。皇馬暫踢多一場，兩分落後巴塞排第三。
主場出擊的皇馬，力求擺脫歐冠輸波失利，聯賽迎戰降班區的華歷簡奴，皇馬由賓森馬領軍阿辛些奧、華斯基斯正選進攻。
主場出擊的皇馬開波攻勢不斷，十三分鐘，華斯基斯妙傳賓森馬窄角度射入，皇馬領先一比○。落後的華歷簡奴有機扳平，惜維拉斯基斯頭槌攻門中柱彈出。皇馬同樣有機拉開紀錄，但阿辛些奧單刀被客隊門將迪米卓域斯基神勇救出，半場前卻奧斯、馬些路先後遠射，先後中柱及被門將救出，皇馬半場領先一比○。
高圖爾斯勇撲救
換邊後皇馬續主導形勢，拉莫斯接應卻奧斯罰球頭槌破網，但越位在先食詐糊。華歷簡奴尾段不乏機會扳平，惜比比遠射、阿歷斯倒掛、維拉斯基斯補射均被高圖爾斯救出，皇馬最終守住一球勝局全取三分。
皇馬主帥蘇拿利對勝仗感滿意：“我很滿意球場今場表現，球隊上半場表現很好，控制着比賽形勢，有不少入球機會，當然我們可以入更多波，只可惜埋門一腳做得未夠好。不過對手今戰表現唔錯，球隊在今場保持清白身，我認為已經交足功課，希望球隊在世冠盃能保持好表現，因為世冠盃是今季其中一項重要錦標。”