阿Bob開頻道分享正能量
向來樂天派的林盛斌(Bob)，平日多在社交平台分享一些正能量信息幫大家打氣，今年他透露計劃開設個人頻道：“新年後就會積極拍片，類似係一啲課程，令大家點樣諗嘢正面、開心啲，點樣在困難中企返起身、點樣賺錢。但唔係人生課程，只係覺得香港唔係太多人講呢方面內容。我唔係大師，仲係小朋友階段，只係過去呢十年睇咗好多有關呢類型的書、聽咗好多大師級講座，希望將自己學到的同大家分享。”
近年事業發展順暢、家庭美滿的Bob，去年因疫情關係，不少工作突然煞停，旗下的製作公司更是要動用儲備運作。他說：“公司大約有十個員工，我同拍檔講，幾辛苦都好，要留住每一個員工。好彩咁多年來儲落唔少客人，每個月都有啲工作做，都維持到公司，但可能早兩年賺到的都要拎返晒出來。做生意就係咁，總有高低起跌，營運係需要多少少時間，但頂得住就冇問題。”