胡鴻鈞新碟改唱腔
日前胡鴻鈞作客TVB娛樂新聞台節目《StarTalk》，接受主持人許文軒專訪，大談再推出新碟的感受。胡鴻鈞說：“今次出碟感受好深，一來經歷咗上年喺音樂上嘅休息，再加上之前拍劇受傷，所以有一種重新出發嘅感覺，休息嘅時候可以畀時間自己同自己傾偈，更清楚知道未來條路可以點行，或者以往發生嘅事有咩做得唔夠好，可以點改善。”
談到今次唱片參與度高，更加有一半作品屬其創作，成為真正的創作歌手，胡鴻鈞說：“創作歌手呢個名真係當之有愧，自己唔係創作出身，亦唔係以創作歌手姿態入行，所以呢條路都係慢慢摸索中，依家努力學習同創作。”談到新專輯中的歌曲唱腔有所改變，他直認說：“參加比賽出身嘅歌手，好多時都會有Show Off腔，而家聽返覺得有啲造作，依家後生嘅歌手同埋個潮流，唱嗰時都唔會太Over同唱得太用力，佢哋唱得好舒服，但有好多情緒，亦有技巧，我同監製商量後決定將把聲放輕好多。”