邀谷祖琳拍慢煮廚房
楊千嬅拒做怪獸家長
在抗疫期間盡情享受烹飪樂趣的楊千嬅，數月前策劃在Youtube開設頻道，親自上陣，命名為“千言 · 慢煮”，每集邀請不同嘉賓無所不談、邊煮邊傾。
楊千嬅在疫情期間宅家入廚樂，更不時將煮食片段上載到社交平台分享。經過數月的籌備，催生了她在Youtube開設煮食頻道的念頭。由千嬅親自上陣的“千言 · 慢煮”於今日正式上架，打頭炮嘉賓同樣是靚媽級的谷祖琳（小谷）。兩人在節目中分享在職媽媽的心得及湊仔樂，千嬅更煮出她的囝囝Torres最愛食的蛋包飯。
千嬅與小谷兩位在職媽談到湊仔經，特別有共鳴。被問到做媽媽後為了工作而未能專心照顧子女可會有些內疚感？小谷認為不應因此而自責：“即使廿四小時陪伴，亦不代表是好事。”她覺得身教才是最重要。自認民主媽咪的小谷，認為不能過分照顧子女，因為有時她見到女兒十分依賴，做任何事也伸手叫人幫手。她說：“有次女兒用Zoom上堂做功課，遇上不懂的問題便叫我答。其實有時我都唔識點解答，我就叫佢去問Siri（手機語音助理）啦！我雖然係你阿媽，不過我唔係一定叻過你，現在的教學方法同以前已經唔一樣。”
千嬅自言為人母初期很緊張：“好似讀兒童心理學一樣，有時我會反省會不會逼得太緊呢？提醒自己係不可以做怪獸家長的！”千嬅覺得現在時代不同，大家追求的境界比以前高，她更笑說：“其實呢句要贏在起跑線係有啲大鑊，有時令到家長會諗多咗！”
千嬅與小谷認為在職媽媽未能全天候照顧子女，所以對老公亦一樣，有時更可能會疏忽了他們。做老公的是否有投訴呢？千嬅說：“個仔發燒時我會好緊張，如果燒到四十度，我會成個人癲晒。不過老公會好冷靜，等個仔好返後，佢會話其實他都會發燒！”小谷笑謂丁生是想嗲老婆而已。小谷又說：“有啲朋友的老公係會詐型，話仔女出世後就冇理過佢。如果佢同我講就一定同佢開拖，我會好嬲，因為娶個老婆返屋企咁緊張你啲仔女，要跪拜多謝佢啦！唔該呢啲老公醒扒少少，幫老婆分擔吓，唔好搞咁多嘢啦。”