家樂收買衛詩雅姪女做老婆
陳家樂、衛詩雅、談善言、郭奕芯等昨日現身新片開鏡儀式，陳家樂和衛詩雅第三度演情侶，兩人笑言今次終於是開心結局，但就沒有親熱戲。
衛詩雅自揭在戲中有突破性演出：“要穿上通花喱士舞衣大跳鋼管舞，性感程度連自己都無勇氣睇，在屋企時一定不會這麼性感。她表示為了這場戲，近日頻頻健身結實臀部肌肉：”之前排練時連工作人員都認唔出係我。”家樂說：“導演唔准我去探班，留待正式埋位時拍到我真情流露一面。我都驚，好似見到家姐在我面前。我們實在太熟稔，好似拍了多年拖，又似家人的感覺。”衛詩雅即說：“我哋拍咀戲，感覺似在錫自己的手臂。”同女藝人拍親熱戲，家樂是否要向緋聞女友連詩雅備案？他笑說：“唔會，拍戲而已。”
衛詩雅的四歲大姪女有份參與拍攝，原來小女孩當家樂係“老公”，衛詩雅笑說：“佢要同我姪女備案就真，姪女聽到有家樂份才答應演出。日前收工時喊住口話要再繼續拍，又話長大後都要演戲，因為老公都拍戲。”家樂續說：“兩年前用一盒餅就搞掂咗，我哋已訂婚，佢姪女好可愛。”衛詩雅搞笑說：“唔好畀佢知你任何緋聞，好彩佢未識字。”家樂如中死穴，即時轉身行開。