Mirror三成員各推單曲
柳應廷拍MV想縮沙
人氣組合Mirror繼姜濤及陳卓賢推出個人單曲後,另外三位成員盧瀚霆、江熚生及柳應廷近日亦分別推出個人單曲。三人的歌曲風格迥異,各有特質。
盧瀚霆(Anson)、江熚生(AK)及柳應廷(Jer)近日分別推出個人單曲,並在日前拍攝了新歌MV。三人向來事事力求完美,所以在拍攝MV期間,大家都付出了不少努力。AK的MV更獲一班隊友及好友力撐,令他十分感動。Jer就得到花姐加持,為他執導《水刑物語》的MV,令Jer十分感激。
唔講唔知,原來Jer唔熟水性,拍攝期間一度擔心發生意外。他回憶說:“落水那一刻有掙扎過唔想再拍,因為我唔熟水性,仲要孭住鉛潛落三米深水底,池底又黑,好冇安全感。不過花姐在旁一直鼓勵,我不斷嘗試,工作人員又幫我做足準備,最後我終於克服恐懼。潛落水再上水面時,因為水壓搞到個胃好唔舒服又想嘔,仲飲咗幾啖水,但最終都拍出最靚的畫面。”
近期新型冠狀病毒疫情尚未穩定,但三人仍各有各忙。Anson與Jer除了繼續參與電視劇《男排女將》的拍攝外,二人亦落力拍片冧粉絲。Jer說:“拍攝現場每個角落都必備酒精,工作人員亦時刻提醒要洗乾淨手才進食,防疫方面算做得好充足。不過唔使開工時,唔係好夠膽出街,多數會留返喺屋企,拍短片唱歌給粉絲聽,等大家留在屋企都可以聽到我哋的歌聲,冇咁悶。”
Anson說:“拍劇以外,我正在準備第二首單曲。錄音時會格外小心,其實只要注意衛生乾淨,都唔係太驚。唔使開工的日子,我通常會留在屋企做Gym或者拍片上YouTube。因為今年我有個新目標,就係重新啟動返我個頻道,播出多啲片,所以近期會密密剪片,亦計劃一下拍乜主題給大家看。”
AK就表示:“抗疫時期其實亦係最佳增值時機,我依家抽多咗時間上堂學唱歌,在屋企亦會努力練習,裝備好自己,期待下一次台上演出的機會,到時就可以好好發揮!”