閨密入廚賀新春
蔡少芬迫陳法蓉做契媽
踏入新春佳節，蔡少芬(Ada)與陳法蓉(Monica)這對相識逾廿載的好閨密，難得首次共同下廚，現場針鋒相對笑料百出。Ada更大爆Monica大派檸檬，拒絕跟她的兒子張樂兒上契。
蔡少芬與陳法蓉這對好閨密過新年搞搞新意思，齊齊獻身煮兩道賀年菜“萬事如意五福袋”、“招菜進寶黃金蝦”，向大家拜年。兩人表現有板有眼，無論洗、切、煎、炒皆手到拿來，絕對係美貌與廚藝並重。自誇“煮咩都OK”的Ada透露閒時經常入廚：“就連囡囡返學的飯盒、點心均由我一手準備。”但自從兒子出世後，忙於照顧兒子才疏於入廚。Ada又向Monica大派高帽：“其實我哋兩個煮嘢都叻，但叻在唔同範疇，Monica蒸嘢好叻！”Monica聞言即沾沾自喜：“係呀，曾經上過蔡瀾節目，煮過冬菇炆雞。蔡瀾試食後，話係佢食過最好食的冬菇炆雞。”Ada即神回應：“係咪蔡瀾從來未食過咋！”此話一出，全場哄笑。
兩人無所不談，提到過往張晉亦曾為Ada下廚時，Ada即問Monica：“你有冇煮過嘢食畀男朋友？”Monica就大方表示：“一定有！而且我煮一定會好食，因為我用愛心煮，通常都係簡單菜式。”在烹調過程中，Ada大爆秘密：“我打算契個仔畀佢，等佢有條仔，而且仲要係靚仔！點知佢唔肯，我老公都叫我唔好迫佢。”Monica反擊說：“點解要契呀？分身家畀你個仔呀？我有好多朋友都有小朋友，好難個個契！而且我又好鍾意你細囡，唔通我唔契囡囡，只係要契仔咩？既然我同你關係咁好，唔使契啦。”
其實兩人亦有曬溫馨的一面，Ada透露當年參選港姐時，曾在髮型屋撞見Monica：“這是我們第一次遇見，當時陳法蓉已經係港姐冠軍、雍容華貴的大明星，而我只是其中一位參選佳麗。點知轉頭有個髮型師走過來同我講，有人讚你靚喎！陳法蓉讚你呀！我開心到幾晚睡不着。”兩人憶述○三年在內地合拍劇集《水月洞天》，當時大家的粉絲在網上互罵，Monica說：“我的粉絲罵Ada係‘冇飯食的排骨’，她的粉絲罵我係‘匿在濛鏡後的老妖怪’，之後我哋拖住手同粉絲講，其實我哋真係Friend，跟住粉絲就再沒有互罵了。”