自動請纓當傑仔嘉賓
祖兒面懵食檸檬
容祖兒前晚再“復工”舉行第十五場演唱會,除了邀得草蜢擔任嘉賓外,更吸引到“容姨”譚倩紅前來捧場。祖兒笑言他朝步入八十之齡仍如此精靈,必定繼續開騷。
狀態大勇的容祖兒(Joey)開場未幾就自爆瘀事:“今日出場前,不知何解被反鎖於廁所,要人來救才開到門。”隨即叫全場“集氣”驅走負能量,引來叫喊聲不絕,全晚瘋癲大合唱,熱爆紅館。
到嘉賓環節時,Joey先賣關子說:“連日來不同職業人士都有出現,有農夫之類,今日係昆蟲類,有三隻,有個跳舞跳到開學校,有個跳到頭髮長過我,有個跳到扭吓擰吓遲些自己開演唱會,有佢哋嘅地方好似開派對咁開心。”草蜢現身舞台後跟Joey合唱《失樂園》,繼而因Joey點唱,再合唱了《ABC》。
Joey恭喜蔡一傑即將開個人演唱會,更主動請纓問他要否請嘉賓?豈料傑仔尷尬地問:“你係咪好想?我有個空缺,玩另類做吓和音?”Joey呆一呆,說:“我唔熟喎。”點知傑仔再開口夾着脷:“我諗吓……”祖兒聽到“諗吓”即刻大笑,傑仔成頭汗咁解釋:“我唔係推你的意思呀,你來,我絕對歡迎,咁大家記得來睇啦,有Joey呀!我係唔好意思呀,你作為一個天后級。”祖兒即刻接話:“咁難得你開演唱會,點需要唔好意思呀你!你又係小嘢咩?你都係Diva!”
當晚最驚喜的應該是年屆八十七歲高齡的《真情》“容姨”譚倩紅如同小粉絲現身觀眾席上,坐正第一行的她跟住Joey一齊唱,又等候握手,非常投入。難怪Joey其後在社交平台興奮留言:“真係容姨呀!我在台上一路唱一路望一路諗,幻覺?容姨冇理由識我口架,不過唱到最後一首歌,我就好肯定。我哋仲握手口添,好開心呀我。話時話,我到了八十歲時候都會係容姨啦,如果到時仲可以咁精靈,一定繼續開騷,驚你唔來咋。祝譚善(倩)紅姨姨身壯力健,每日平安快樂,笑聲滿載溫馨。”