演唱會上公開囡囡畫作
劉德華狀態大勇
去年經歷過墮馬意外受傷的劉德華,傷癒後狀態大勇,前晚在紅館啟動廿場演唱會演出,頭場毫不留力帶來精彩一夜。向來對家人抱低調保護態度的華仔,今次亦大方地讓妻女坐在嘉賓席上欣賞,囡囡劉向蕙搶晒鋒頭。
劉德華相隔八年再戰紅館,傷癒後狀態大勇,操得甚弗的他展露出一雙麒麟臂,但就吝嗇地未有除衫騷腹肌。頭場只見華仔在台上圍住觀眾席跑,又唱又跳,體力應付裕如。可能有老婆和囡囡在場,華仔和女舞蹈員的貼身舞僅是點到即止;同時為免觸到舊患,華仔今次謝絕握手環節,反而與山頂位觀眾有較多近距離接觸。
華仔藝高人膽大,出場時站在僅容一人身位的吊台上繞場一周,期間升到超過二層樓高的紅館山頂位置,且有點輕微搖晃,看得人心驚膽跳。華仔隨後換上黑皮褸獻唱《假裝》,一眾女舞蹈員向華仔掃胸摸身,但點到即止未過火位。之後華仔把抹過汗的毛巾拋到觀眾席上,粉絲爭相搶奪,華仔笑說:“我仲諗會唔會丟出去冇人理?哈哈!”華仔之後再扮除褲,引來一陣尖叫聲。華仔續說:“原本去年開演唱會的,諗住個女剛剛讀K3,我會輕鬆些;今年讀小一較為煩,所以擔心多一點,壓力好大。我帶住好緊張的心情來到這裡,見到好輕鬆的觀眾,令我完全解放所有緊張和壓力,我不知講甚麼好,多謝你們!”
向來對家人十分保護的華仔,今次一反常態,大方讓太太朱麗倩和六歲囡囡劉向蕙坐在嘉賓席上欣賞。向蕙坐在媽咪的大髀上睇足全場,眼仔碌碌的她表情多多,甚是可愛。當華仔唱《17歲》時,舞台頂部投射出囡囡向蕙的畫作,是一幅彩色的一家三口、有彩虹有屋仔、充滿歡樂氣氛的圖畫。此時朱麗倩示意囡囡望向作品,向蕙即露出笑容,表現可愛,溫情滿瀉。
尾聲由華仔炮製串燒Medley,現場有兩個舞蹈員化身“巨頭華仔”出現,相當吸睛。華仔笑問:“依家幾多點?以前我唔會理會,今次我做老闆,唔理了,繼續唱。”繼而又感性說:“好多謝過往日子,無論健康、開心與否都有你們支持。未來仲有好長日子,只要你們不丟低我,我會同你哋一齊。”最後以《真永遠》為頭場劃上圓滿句號。
華仔完騷後在後台表示:“囡囡是第一次看演唱會,太太以前有來過睇,傳媒有影過。公開係免得你哋亂寫,話我避這避那,大大方方咪算。”聽到向蕙睇足全場時,他興奮得提高嗓音說:“係咪呀!”
對於頭場發現有黃牛飛和假飛事件,要報警處理,華仔稱:“紅館方面說會處理,我之前有拍片提醒大家小心。因大家一心一意來支持我,最後發現假飛會幾唔開心。如果遇到這些情況,希望大家冷靜少少,讓紅館和警方處理。”至於華仔旗下的映藝公司與台灣聚善美公司的合約糾紛,華仔謂:“我在這事情上沒有正面跟進,因我所有時間放在演唱會上,交由公司和律師跟進,希望找到最好方法解決。”