勇敢追逐音樂夢
SCAMPER永不言棄
本地搖滾樂隊SCAMPER近年忙於在內地十六個城市舉行巡演,今年六月終於回澳演出,舉行“少年!JUMP慈善音樂會”,並推出首張專輯《少年!JUMP》,迴響不俗。六位大男孩組成樂隊多年,歷盡艱辛仍絕不言棄,逐步實現心中的音樂夢。
二○○五年成軍的SCAMPER,成員包括:主音Angus,結他手Ding、Jun,貝斯手Edmond,鍵盤手A Pak及鼓手El。談到音樂會後的工作計劃,Angus表示:“開始錄新歌,計劃再出EP,我哋想每隻EP都好似一本書咁,有一個主題貫穿全部歌曲,今次《少年!JUMP》係青春熱血,而下一隻碟會同情感有關。另外亦準備接下來嘅巡演,同埋籌備MV拍攝工作,請大家密切留意。”
澳門打Band唔容易,好多樂隊離離合合,被問到SCAMPER成員怎維繫友情,Ding說:“由我哋玩Band開始,見盡好多澳門樂隊,成員因為生活所迫、意見不合而放棄、解散,好感觸,所以好驕傲SCAMPER六個人能夠Keep到而家。講真其實我哋都有試過不和,喺感情上有爭拗,不過其實大家都係對音樂有執着,都係想做好件事,最重要係互相體諒。”
樂隊成員各有正職,被問到怎樣兼顧工作、生活和樂隊活動,Jun說:“我而家係結他老師,教結他其實難過夾Band,不過教結他同夾Band可以相輔相成,精進技術。辭職前都曾經掙扎,但全職工作嘅時間難以配合樂隊演出,最後決定轉換生活方式,發現其實冇想像中咁艱難,可以兩者兼顧。”
SCAMPER六子成軍十二年,歷盡波折都依然保持單純嘅心,繼續開開心心玩音樂。見到佢哋喺舞台上用盡全力去演奏,內心都有種莫名嘅感動——慶幸仲有一班大細路,燃燒佢哋嘅青春去話畀出面嘅人聽,澳門人可以夾到一隊出色嘅樂隊,亦都令人相信,夢想,只要堅持就會實現。
文:廣野人